Meray tarz-e-sukhun ki jaan hain gul bhi gulustaan bhi
Mera husun-e-bayan hay khaar bhi chaak-e-giraiban bhi

Meray daaman man, jugnoo hain jahan aur chand taaray bhi
Isi daaman man rakhtaa hoon kuch aahian aur shararay bhi

Jo meri umar ka hasil hay zik’r-e-Mustafa karna
Taqaza-e-Muhabbat hay bayan-e-karbala karna

Taqaza hay zameer-e-shayer haq go ki fitrat ka
Ke haq goi-o-baibaki pe mabni ho sukhun us ka

Bayan sayyid-ush-shuhadaa’e ki jab tamheed hoti hay
Wo hi ahad-e-wafa kay rasam ki tajdeed hoti hay

Hussain ibn-e-Ali, sabt-e-peyambar, sharf-e-Insaani
Wo jis kay rukh pet hi Noor-e-Muhammad ki farawani

Shaheed-e-karbala tareekh ka unwaan hay goya
Hussain ib’n-e-Ali har qal’b man mehmaan hay goya

Bataya’ kis tarah kartay hain ummat ki nigahbaani
Sikhaya, kis tarah rakhtay hain sajdoon man ye paishaani

Jalaya us ne zulmat man charaag-e-Noor-e-imaan
Ye sab kuch jaantay thay phir usay daitay na thay paani

Buhut hi mukhtasar’ bandoon say Rab ka fasla nikla
Haram say lay kay ahl-e-bait ko, jab qaflah nikla

Amaamah baandh kar ah’d-e-wafa ka, Karbala Jana
Tha ummat kay liye Maqsood un raahoon ka dikhlana

Wo rahain jo urooj-e-aadmiat ka sabab thihreen
Zawaal-e-zulum thehreen, Haq parastoon ka laqab thehreen

Arab ki sar zameen’ taptay huway sehra, khazaan kay din
Safar man thay Rasool-e-hashmi ki jaan-e-jaan kay din

Ye manzil aazmayesh ki barhi dushwaar hoti hay
Fiza man zahar hota hay, hawa aazar hoti hay

Jab hasti mard-e-momin ki supard-e-daar hoti hay
To saye kay liye sar par faqat talwaar hoti hay

Wo jis ki shaan man thi aayah tatheer-e-Qurani
Isi ki ahl-e-koofah nay kia naizoon say mehmani

Talab Nana say kausar ki shafaa’et ki sufarah bhi
Nawasay par wohi karnay lagay teroon ki barish bhi

Jalay khaimay badan chalni thay khoon man tar qabayen then
Khuda ko jo pasand aati hain wo saari adayen theen

Wo chehray Noor kay thay, gird jin kay Noor kay haalay
Banay wo khaak-o-khoon man ayek ho kar karbala waalay

Wo chehray wo badan jo ish’q ka israar hotay hain
Gubaar-e-khaak say un kay kafan tayar hotay hain

Na hota gar Muhammad ka gharaana ayesi mazal par
Tu urh jaata faraug deen ka mustaqbal dhuwan ban kar

Salaam us par ke jo Haq kay liye sar bhi kata aaya
Salaam us par jo ummat kay liye ghar bhi luta aaya

Salaam us par mera jo khoon kay darya man tera hay
Salaam us par ke jo Nana kay parcham ka pheraira hay

Salaam us par ke jis ne zindagi ko zindagi bakhshi
Saroon ko sar bulandi aur zauq-e-bandagi bakhshi

Salaam us par ke jo dosh-e-peyambar ki sawaari hay
Salaam us par ke jannat jis kay ghar ki raahdari hay

Teer seenay pe, barchi push’t par jhailay huway insaan
Salaam aye Fatimah ki god man khailay huway insaan

Buhut Aasan hay zik’r-e-shaheed-e-karbala karna
Daroon-e-qal’b mushkil hay wohi haalat bapa karna

Shaheed-e-karbala kay zikr ka mujh par jawaab Aaya
Ke teri Zaat man ab tak na koi inqilaab aaya

Saraasar aabroo bin gairat-e-sharam-o-haya ho ja
Agar mujh say Muhabbat hay to mera naq’sh-e-pa ho ja

Comments are off for this post

Teri takreem man teri ta’zeem man kis ko shak hay bhala karbala karbala
Phir bhi mera qalam, tujh say shikway raqam aaj karnay chala karbala karbala

To faraat aashna’ tujh man dajlah rawan phir bhi aal-e-Muhammad ki sookhi zuban
Teray mehmaan thay, apnay mehmaan say to ne ye kia kia karbala karbala

Wastah un kay aaba’e ka day kar agar, mangtaa apnay seenah man zam zam ka ghar
Ik karshima dikhata wahan bhi Khuda, kiyoon na maangi dua karbala karbala

Raat ho din ho jab un kay hiltay jo lab, apne khaimoon man Quraan parhtay thay sab
To ne daikha ye sab, to ne khud bhi suna aur kuch na kia karbala karbala

Jin kay ahl-e-haram Noor-e-mastoor-e-Haq, chadrain jin kay sar ki quraan ka waraq
Jin kay khaimoon kay parday gilaaf-e-Haram, un ko loota giya karbala karbala

Aarzoo iltija hasratain manatain, jin kay qadmoon kay bosay ko hoorain karian
Ayesi shahzadiyan aur barbadian, to ne daikha kia karbala karbala

Wo sakeenah thi jo gam say mosoom thi, kitne maasoom thi kitne magmoom thi
Poochti phir rahi thi har ik say pata, to nay kia ke dia karbala karbala

Nasal say bu lahab ki wo do haath thay jin man naizah tha naizay pe far’q-e-Hussain
Kaash! Hotay Nabi to utarti wahan phir say karbala karbala

Ahl-e-bait aur un ki Muhabbat adeeb, ye muqaddar ye qismat’ ye roshan naseeb
Is wazeefah say raazi hay mujh say Khuda daikh ye martaba karbala karbala

Comments are off for this post

Aaya na ho ga is tarah rang-o-shabab rait par
Gulshan-e-Fatimah kay thay saray gulab rait par

Jaan-e-batool kay siwa koi nahi khila saka
Qatra-e-Aab kay bagair itnay gulaab rait par

Tarsay Hussain aab ko man jo kahoon too bay adab
Lums-e-lab-e-Hussain ko tarsa hay aab rait par

Ish’q man kia lutaye ishq man kia bachaye
Aal-e-Nabi ne likh dia sara Nisaab rat par

Lazzat-e-sozash-e-bilaal, shoq-e-shahadat-e-Hussain
Jis nay lia yoonhi lia apna khitaab rat par

Jitney sawal ishq aal-e-Rasool say kiye
Ayek say barh kay ik dia sab ne jawaab rait par

Aal-e-Nabi ka kaam tha Aal-e-Nabi hi kar gay
Koi na likh saka Adeeb ayesi kitaab rait par

Comments are off for this post

Zeenat-e-dosh-e-Mustafa tujh ko mera salaam hay
Noor-e-Nigah Fatimah tujh ko mera salaam hay
Manzal-e-hast-o-bood man kon abad maqam hay
Diakh raha hoon man Hussain ayek Tera hi Naam hay

Kashta-e-khanjar-e-tasleem-o-raza tujh ko Salaam
Mash’el-e-Noor-e-Muhammad ki Zia tujh ko Salaam
Nikaht-e-boo-e-gulustaan-e-wafa tujh ko Salaam
Aabroo-e-sadaf sadaq-o-Safa tujh ko Salaam

Comments are off for this post

Dukhtar-e-khatam-e-Rusul jaan-e-peyambar Fatimah
Aye waqar-e-boo Turabi, shaan-e-Hayder Fatimah

Rooh ki tashna labi ko Aap kausar, Fatimah
Sajdah gaah-e-ahl-e-imaan, Aap ka dar Fatimah

Lut raha tha karbala man Aap ka ghar’ Fatimah
Aap nay daikha hay mahshar’ qabl-e-mahshar, Fatimah

Aap ki nisbat hui ham ko muyassar’ Fatimah
Aap ki madhat hui apna Muqaddar Fatimah

Zab’t kay khoogar Ali thay, Sab’r kay khoogar Hussain
Aap ki hasti man hain donoon hi johar Fatimah

Zee has’b, aala nas’b, Zahrah laqab, zoo-ul-ihtiraam
Sab say aala sab say afzal’ sab say behtar Fatimah

Kham shehnshaahan-e-aalam ki jabeen hay daikh kar
Aap ka naqsh-e-kaf-e-paye mutahhar, Fatimah

Bandage kia, deen kia, imaan kia, Islaam kia
Mustafa, Shair-e-Khuda, shabeer-o-shabar Fatimah

Sarfuroshi ka sabaq day, sabar day, ayesaar day
Ab kahan ayesi koi aagosh-e-madar, Fatimah

Ar’sh hil jata agar faryad ko uthtay wo haath
Aap ne rkha unehain chakki ka khoogar, Fatimah

Mustafa kay aura aal-e-Mustafa kay hain Gulaam
Apnay daman man chupalain ye samjh kar, Fatimah

Khatimah bilkhair ho ish’q-e-Nabi man jab Adeeb
Dal dain Rahmat ki is mujrim pe chadar Fatimah

Comments are off for this post

Hui madah-e-peyambar aur hamd-e-khaliq-e-baari
Basad girya’ basad naala’ basad aah-o-basad zaari
Qalam hay dam bakhud’ jazbaat sakin’ rooh larzaan hay
Adeeb’ khatoon-e-Jannat’ Fatima Zahra ki hay baari

Kamala-e-Zikr-e-Zahra say agar hasti hui akmal
Jamaal-e-zikr-e-Noor-e-Fatima say dil bana ajmal
Tauqeer-e-Muhabbat hay ke ye Taseer-e-nisbat hay
Sukhun sanji hui ahsan zubaan daani hui afzal

Takhleeq man tasleem-o-Raza jin kay khasayel
Ma’soom mukhayyar’ mutsarrif’ mutkaffil
Sarkaar-e-do aalam ki tarah Fatima Zahra
Mushafiq’ mutabassim’ muthammil’ mutwakkil

Wo hamid-o-Mahmood ki ulfat ka Zahoor
Wo Rahmat-e-kul Qasim-e-maqsoom ka Noor
Ye shaan’ magar aalam-e-tasleem-o-raza
Cakki ki mushqqat’ ba tabassum manzoor

Shafeeun siraajun muneerun ki dukhtar
Shujaun shareefun shaheedun ki maadar
Wo hurmat khaatoon-e-jannat’ wo jannat ki hurmat
Ameerun jarun Ali jin kay shohar

Jis ko Rahman-o-Raheem-o-Rahmat-e-kul ka shauoor
Jis ko irfan-e-Muhammad’ jis ko faizaan-e-Rasool
Zee hasb’ aala nasab’ Zahra laqab’ zoo-ul-Ihtraam
Deednee-e-Mustafa aur deedah-e-Rahmat ka Noor

Comments are off for this post

Ham talabgaar-e-sakhaawat ya Ali mushkil kusha
Tum inayat hi inayat Ya Ali mushkil kusha

Bazoo-e-khyber shikn, aur luqma-e-naan-e-juwein
Aye shanshah-e-qinaat ya Ali mushkil kusha

Aap ko nisbat Rasool-u-Allah say hay aur man
Aap say rakhta hoon nisbat Ya Ali mushkil kusha

Aashiqoon ka dil hay ka’bah aur dil ki dharhknain
Matrab-e-jashan-e-wilaadat ya Ali mushkil kusha

Mard-e-momin ka sahara’ Hurriyat ki Aabroo
Qalb-e-Momin ki hararat ya Ali mushkil kusha

Wo shujaat ho’ sakhawat ho’ qina’et ya jihad
Aap hi ki hay qiyaadat Ya Ali mushkil kusha

Fatih-e-khyber tumharay chahnay waloon pe aaj
Dushmanoon nay ki hay shiddat Ya Ali mushkil kusha

Phir wohi bagdaad-o-misr-o-shaam kay hain Shub-o-shaam
Deejiye shoq-e-shahadat Ya Ali mushkil kusha

Dar guzar man aap say barh kar koi guzra nahi
Aye saraapa-e-Muhabbat Ya Ali mushkil kusha

Dar guzar kejiye khata aur dejiye is qom ko
Apna bazoo’ apni himmat ya Ali mushkil kusha

Aap kay dar say adab say mangta hay ye adeeb
Sadqa khatoon-e-jannat Ya Ali mushkil kusha

Comments are off for this post

Dar-e-maikhana wa hota hay ab josh-e-aqeedat ka
Sharaab un kay tasawwur ki saboo un ki muhabbat ka

Nazar kay saamnay sab ahl-e-dil aur ahl-e-nisbat hain
Khudawand bharam rakhna meri nisbat, meray gam ka

Himayat man’ imamat man’ shujaat man’ hawadis man
Ali daawar’ Ali rahbar’ Ali Hayder Ali Mola

Koi aabid’ koi aarif’ koi aatif’ koi aakif
Koi aajiz’ koi aali’ koi aashiq nahi ayesa

Qinaat man qalandar wo sakhawat man samandar wo
Shujaat man laqab hay quwat-e-parwardigaar un ka

Wo saifullah’ wajhullah’ Damaad-e-Rasool-u-Allah
Wo hi shabeer ka baazoo, wohi sarmaya Zahra

Butoon ka sar jhukaanay man’ diloon man ghar banane man
Wohi zarb-ul-fatah nikla, wo hi Khyber shikan thihra

Ameerun wo jariyun wo shujaaun wo shaheedun
wo faseehun wo baleegun wo khitaabat par jahan shaida

meri izzat meri azmat’ meri ulfat meri nisbat
Ali Mola Ali Mola Ali Mola Ali Mola

Adeeb un ki muhabbat man agar aankhoon man ashak aaye
Idhar aankhoon man nam hoga udhar lutuf-o-karam hoga

Comments are off for this post

Na khanqah kay bahir na khanqah man hay
Jo boo turaab ka rutbah meri nigah man hay
Yehi hay dolat-e-imaan-o-eilam-o-aqal-o-yaqeen
Ali ko jis ne pukaara hay wo panah man hay

Gar jahan-e-fikr man darkar hay ik inqilaab
Fikr ki rahoon say uth kar ishq ka ho hamar kaab
Chak kar daaman fasoon-e-falsafah ka, marker
Ayek na’rah ya ali mushkil kusha ya boo turaab

Bahaal-e-gam dil-e-bay taab ra qarar’ ali
Kareem-o-bandah nawaz-o-karam shi’aar ali
Kharaab haal-o-khata kaar-o-dil-e-shikastah raa
Khata muaaf’ khuda taras’ gamgasaar’ ali

Har gardash-e-ayyam pe jo galib hay
Har naara-e-inqilaab ka jo qaalib hay
Har lamha-e-mushkil man talab hay jis ki
Wo Naam’ ali ibn-e-abi talib hay

Zi khaak-e-paye ala ma falak madaar shudaim
Ze lutuf-e-chasham-e-ala fasal-e-no bahaar shudaim
Hain cha faiz raseedi ze bosa-e-na’elain
Gunahgar ke boodaim-o-taajdar shudaim

Comments are off for this post

Khda ka khof zik’r-e-Mustafa sarmaya-e-Usman
Sarwar-o-kaif Qurb-e-Mustafa sarmaya Usman

Bayan sarkar ki madhat sada, paraya-e-Usman
Na tha ayesa na ab hoga koi ham paya-e-Usman

Na tha aayenah dil par gubar-e-asbiat un ky
Agar che thya hareef-e-hashmi ajdaad sab un kay

Safa-e-batni un mukadar ho na sakta tha
Koi is dil man ab tukhum-e-riqabat boo na sakta tha

Jihalat kay andhairoon say nikal kar Noor man Aaye
Qaraabat wo miley do Noor walay Aap kehlaye

Qadam hijrat ka Makkah say nikala Aap ne pehlay
Habsh ko deen ka bakhsha ujaala Aap ne pehlay

Wo dor-e-jahiliyat jo bhara tha Aab-e-gulgoon say
Haya’e walay kay lab na aashna thay us kay afsoon say

Haya’e kay zik’r ka jab bhi koi unwaan hota tha
Lab-e-shaah-e-Madeenah par faqat usman hota tha

Nabi irshaad farmatay kitaabat Aap kartay thay
Barhi dushwaar thi manzil’ ba asaani guzartay thay

Ishaarah par nabi kay maal sab qurbaan ho jata
Jo hatim aaj hota, Aap ka darbaan ho jata

Yahoodi ko dia kul maal, shereen aab kay badlay
Huay sairaab tashnah lab Muslaman’ beer-e-roomah say

Banay wo bai’et-e-Rizwaan man Taaj-e-fakh’r ka Turrah
Nabi ne haath bai’et man jab un kay Naam par rakha

Maraakash say milay Kabul kay danday ah’d man jin kay
Huay islaam kay zair-e-nageen’ dunya kay ye hissay

Turabulus aur Africa bana islaam ka Hissah
Bagawat misir ki torhi’ fatah qabras bhi kar daala

Huwa jab koh-e-larzaan’ Mustafa ne us say farmaya
Ke tujh par ik Nabi’ Siddique ik aur ik shaheed Aaya

Shahdat mu’atbar thi’ ayek din ayesa bhi hona tha
Sar-e-tasleem apna kham kia’ ayesa bhi hona tha

Shahadat ka wo lamha’ wo tahmmul’ sab’r ka paikar
Jo akhlaaq-e-kareemana ka thehra aakhri manzar

فَسَیَکْفِیْکَھُمْ Aayat pe jab khoon aap ka tapka
Quran ka har waraq daaman ko phailaye huway lapka

Qiamat man karain gay log jab Quraan ki batain
Karain gay saath hi wo Hazrat-e-Usman ki baatain

Utar kar khoon kay darya man jo koi ubharta hay
Hata kar zeest kay parday ziyarat haq ki karta hay

Nahi marta Adeeb us raah man, jab koi marta hay
Wo kab marta hay jo raah-e-shahadat say guzarta hay

Comments are off for this post

Aaye to kaatne kay liye sab kay paas marg
Rishta jo aadmi kay badan say hay jaan ka
Us tarah sy kisi ki tawadhu’e nahi hui
Khoon-e-shaheed kay liye daaman Quraan ka

Udhar tarteel-e-Qurani’ koi tarmeem Naa Mumkin
Jo aayat Hukum jo laye’ amal ayesa hi karna hay
Idhar tarteeb-e-usmani ke jo soorat jahan rakh di
Qiamat tak isi tarteeb say Quran parhna hay

To ne bhi ajab shaan dikhaye hay khudaya
Jab teeg nay khoon, Hazrat-e-usman bahaya
Girnay na dia qatrah khoon pehlay zameen par
Rahmat ne teri daaman-e-Quraan bichaya

Az Adam ta Muhammad Mustafa koi nahi ayesa
Ke jin kay aqad man do baitiyaan hon ik peyambar ki
Ho kis kis baat ki tareef Zu-ul-Noorain kay haq man
Haya’e ki, Mustafa ki dosti ki, ya Muqaddar ki

Wo ayek manzar wama remait jahan khuda khud ye keh raha hay
Ye dast dast-e-Nabi nahi hay ye dast-e-qudrat faqat mera hay
Ye ayek Manzar, shajar kay neechay Nabi bai’et kay waqat kehna
Ye dast-e-bai’et Nabi ka hay aur ye dast-e-usman doosra hay

Bachoon ko loriyoon man kahin maan Qureish ki
So jao meray laal ke maan gamgasar hay
Hay tum sy itna piyar, ke Rahman ki qasam
Jitna Qabeelay waloon ko usman say piyar hay

Comments are off for this post

Hujjat kay liye hashar man hogi ye daleel
Har shay ko ata hogi bashar ki Soorat
Allah ki ye shakil kay khursheed-e-Jalal
Allah ka Quran, umar ki Soorat

Deen-e-Haq ki sar bulandi man Nabuwat ki Talab
Bargah-e-Rabbul Izaat man huwa ho jis pe Saad
Saari dunya hay shanshah-e-do aalam ki mureed
Aur umar Khud hain shanshah-e-do Aalam ki Muraad

Saff man jo ghus parhay wo liye Teeg shulah war
Sar kafiroon kay dosh pea aye na phir nazar
Haibat say un ki din man nikaltay na thay aduwe
Ratoon ko khawab man bhi pukarain umar umar

Larhnay man yoon to ayek say ayek bay misaal hay
Phir bhi diloon man khof umar ka ye haal hay
Hain mahir un harb kay baa ham ye mashwaray
Khattab kay pisar say larhaye mahaal hay

Comments are off for this post

Kis nay Nabi ka daman thama sab say pehlay barh kar wo Siddiq-e-Akbar
Kis nay uthaya baar-e-Imamat lay kar izin-e-peyambar wo Siddiq-e-Akbar

Hukum-e-Khuda say chorh chala jab Makkah deen ka Rahbar Naam Khuda ka laikar
Raah-e-Khuda man is dam jo shay nikli naqd peyambar wo Siddiq-e-Akbar

Ik din kis nay khawaab man daikha, jholi man chand Aaye aur phir ghar ghar aye
Deen-e-Muhammad ayesi bisharat lay kar Aya kis par wo Siddiq-e-Akbar

Rooh-e-Ameen darbar-e-Nabi man Taat pehan kar Aaye jhuk kar Haal sunaye
Ahl-e-falak ka pehnawa hay aaj ye kis ki ada par wo Siddiq-e-Akbar

Jin kay daman ki paaki par Rooh-e-Qudus ka Aana Soorat Noor sunana
Ayesi Hurmat waali Umm-e-Ummat jin ki dukhtar wo Siddiq-e-Akbar

Jin ka ah’d-e-Risaalat, barash abr-e-karam ki bay had unka Naam-e-Muhammad
Pathar jin kay dor-e-khilafat man thay laal-o-jawahir wo Siddiq-e-Akbar

Comments are off for this post

Markaz-e-Siddiq-o-Safa markaz-e-imaan Siddiq
Mashaf-e-ishiq-o-Mahabbat kay nigahbaan Siddiq
Isim-e-Azam hain junoon kosh Mahabbat kay laye
Hosh waloon kay liye Naqsh-e-sulaiman Siddiq

Kamand-e-aqal man aye karay khird Tahqeeq
Nigah man jo smaye nazar karay toseeq
Hay jibreel ki parwaaz say paray jo maqaam
Hain is maqaam ki tasdeeq kay liye Sidddiq

Pabosi gulaab say mitti hay mushk-e-tar
Paars ki ayek lamha rafaaqat hay qadr zar
Pahloo ho Mustafa ka muyyasr jisay adeeb
Kia kehaye kia hay apnay maraatib man wo bashar

Kaatib taqdeer ka junbash man jab Aaya qalam
Manziloon say ma wara puhunchay faqeeroon kay qadam
Masjid-e-Nabvi man ik din jaan Nisaar-e-Mustafa
Thay Musallay par Imaam aur muqtadi shah-e-umam

Hain parstaaar-e-Muhammad bay hisaab-o-bay shumaar
Zee waqar-o-sar buland-o-sarfurosh jaan Nisaar
Han magar tasdeeq kay hain martabay kuch is tarah
Yaar-e-hijrat, yaar, gazwah, yaar-e-bazam-o-yaar-e-gaar

Tashna ka maan-e-Haqeeqat ko hain kausar Siddiq
Karwaan-e-rah-e-ulfat ko hain Rahbar Siddiq
Khatam hoga na kabhi silslah ishq adeeb
Ish’q kay Rabb hain, Mahabbat kay peyamber Siddiq

Comments are off for this post

Mahki hui hawa ka mujhay lams jab mila
Meray tasawwurat ka dr misil gul khila
Afkaar kay dareechoon say aanay lagi sada
Kia khoob Haq nay tujh ko ye moqa ata kia
Uth, madah kahwan sayad-e-aali maqam ho
Chal aye gunaah gar zara naik Naam ho

Alfaaz dast basta meray saamnay hain sab
Jancha hay man ne khoob har ik lafz ka nasab
Thara raha hay phir bhi qalam, kia likhoon laqab
Man paish Aftaab misaal charag shab
Kesay bayan ho martaba aali waqar ka
Laon kahan say dhang man parwardigar ka

Lab wa karoon sana-e-kay liye kin kay baab man
Jibreel dast basta hain jin ki janab man
Madaah khud Quran hay risaalat maab man
Meray khiyal ki tag-o-do kis hisaab man
Manzoor shayeri hay na husun-o-kalaam
Aye khama khiyal, adab ka maqam

Sair khiyal-o-fikr ko bastan hain buhut
Tafreeh taba’e Naaz kay samaan hain buhut
Tahreer husun-o-ish’q kay unwan hain buhut
She’r-o-sukhun kay wastay maidan hain buhut
Jin kay qadam say raunaq bazam Hayaat
Tareef is Nabi ki taqaza-e-Zaat

Ye masala-e-takhayyul-o-jazbaat ka nahi
Waqif man gird-o-paish kay Halaat ka nahi
Aur il’m ye ke il’m bhi har baat ka nahi
Irfan mujh ko apni hi khud Zaat ka nahi
Phir mujh say poochna ke Muhammad ki shaan
Goongay ke mun man ho bhi agar to zaban

Qand-o-shahid nabaat ko yak ja karain agar
Gul ki har ayek Zaat ko yak ja karain agar
rangeeni Hayaat ko yak ja karain agar
kul husun-e-kainaat ko yak ja karain agar
jitna bhi rang-o-Noor liye kainaat hay
ye sab tabasum shah-e-deen ki zakaat hay

kehtay hain jis ko madhat sultaan Zul manan
musnad nasheen hay nok-e-zuban par wo gulbadan
sar ta bapa hay nikhat-o-ruanaye chaman
is Noor kay badan pe hay khushboo ka pairhan
khushboo say aur Noor say jis ka khameer hay
zulfoon ki jis kay shaan mashiyat aseer hay

tamheed say guzeer ki jaanib qadam qadam
parhtay huway Durood Muhammad mera qalam
lay kar sarwar ish’q man dooba huwa il’m
ho kar niaz mand’ kia is nay sar ko kham
kham ho kay khat meem banata chala giya
parday rumooz-e-Haq kay uthata chala gaya

wo meem jo Kaman hay ik aagosh ki tarah
mahshar man ayek saya gul posh ki tarah
bandoon pe rab ki rahmat pur josh ki tarah
kham is ka faraq aashiq may nosh ki tarah
jo darmayan Kaman kay aaya amaan man hay
baahar jo rah gaya wo shumaar ziyaan man hay

khulnay lagay rumooz’ muhabbat kay sar basar
honay laga khiyaal pe ilhaam ka asar
ifkaar khushbowon man shara bor tar ba tar
junbash jo lab ko di to tapaknay lagay ghar
is par bhi un ki shaan kay shayaan na likh saka
banda hoon is liye koi Quraan na likh saka

yoon kar rahay hain madhat sarkaar Zulmanan
kausar say dho kay layen hain ta’reef ka matan
phirtay rahay bahaar man lay kar chaman chaman
pehna dia zuban ko anbar ka pairhan
surma hay koh-e-toor ka’ gazah gulaab ka
Agaaz-e-Naat yoon hay Risaalat Maab ka

Pehlay Nabi kay ish’q ki dolat khuda say li
Dolat miley to fik’r ki juraat khuda say li
Juraat mili to husun-e-aqeedat khuda say li
Tarz-e-bayan kay wastay nudrat khuda say li
Juraat mili khiyal mila aur qalam mila
Ye sab milay to Naat pe iz’n-e-raqam mila

Torhi hay man nay maikdah ish’q ki quyood
Meray junoon gam ki tayyun nahi hudood
Hota hay har naf’s mera mannat kash Durood
Pehlay Durood phir sukhun Naat ka wurood
Man bhajta hoon nazar Salaat-o-Salaam ki
Wo bhaijtay hain mujh ko ijaazat kalaam ki

Tabaan usi kay Noor say hay chehra Hayaat
Sadyoon kay jis nay Aakay mitaye to hamaat
Ayek jist jis ki nuskha taskheer kainaat
Jis kay qadam ka naqsh bana il’m madniat
Kehnay ko wo bashar hay agar qeel-o-qaal man
Apni misaal bhi nahi rakhta misaal man

Ye Mahtaab Aap ka chehra nahi nahi
Ye Aftab Aap ka jalwah nahi nahi
Ye boo-e-mushk zul’f ka hissah nahi nahi
Is auj tak na jaye gi pasti shauoor ki
Baala hay har khiyaal say hasti Huzoor ki

Jalti na is jahan man jo shama’e-e-Muhammadi
Dunya ko hashar tak nazar aati na roshni
Hakim ho ya Gulam, gunah gar-o-Mutaqi
Milta na admi ko shuoor khud Aagahi!
Hoti na kuch tameez safaid-o-siyaah
Jalwoon ka aitbar na hota nigah

Jis roz lab kusha kisi ki nahi majal
Daikhain gay Asman-o-zameen Roo-e-zuljala
Hoga maqam deed Rasool-o-Nabi ka haal
Daikhin gay ayek ayek ko miskeen ki misaal
Dhoondain gay anbiya isi Rahmat naveed ko
Tarhpay gi har nigaah Muhammad ki deed ko

Hay kon day sakay ga jo us din koi hisaab
Tobah bhi yaad Aaye to’ tobah ka band baab
Bhai ko bhai day ga na faryaad ka jawaab
Shulay zameen pe hoon gay to naizay pe aftab
Ummat ho, ya Nabi ho, gazab ki nigaah man
Mahshar man hoon gay saaray unhein ki panaah man

Nazaan ho garcha hoon man gunahgar daikhna
Us kamli posh ka hoon parstar daikhna
Anwaar Zik’r sayed-e-abraar daikhna
Mujh say gada kay lab hain ghar baar daikhna
Har dam hay lab pe tazkirah bay nazeer bhi
Raazi Rasool-e-Paak bhi Rabb-e-Qadeer bhi

Naat-e-Rasool-e-Paak man wo aaab-o-taab ho
Ayek ayek lafz madah ka izzat Maab ho
Roshan meray Kalaam ka yoon Aftaab ho
Maqbool bargah-e-Risaaalat Maab ho
Mahshar jab bulaen to is tarah dain Sada
Hazir kar-o-kahan hay Sana khawan Mustafa

Har Aayena dil ki jila zik’r-e-Muhammad
Allah ki bandoon ko Ataa’e Zik’r-e-Muhammad
Makhlooq say khaliq ki raza Zik’r-e-Muhammad
Lazim isi maqsad say ho Zik’r-e-Muhammad
Har aarzoo-e-nutuq ka anjaam yehi hay
Dunya kay liy aman ka paigaam yehi hay

Ho baz’m-e-sukhundan to ye pholoon ka bayan hay
Mojoon ka tarannum hay ye bulbul ki zuban hay
Alfaaz ki az’mat hay khitaabat ki ye shaan hay
Is zik’r say bandoon ko gunaahoon say amaan hay
Jazbaat ko seemaab takhyyul ki jila hay
Ye khaas sharf zik’r-e-Muhammad ko mila hay

Qaim hay muslman ka emaan isi say
Allah kay Talib ko hay irfan isi say
Har aashiq-e-Sadiq ki hay pechan isi say
Insaan ko hay azmat-e-Insaan isi say
Sarmaya emaan-o-Qaraar-e-dil-o-jaan hay
Quraan ki tilawat hay ye Ka’bah ki azaan hay

Naat-e-shah-e-Konain ki sarw-o-samni daikh
Lafzoon ki Qaba man ye ajab gulbadni daikh
Chehrah ki damak Toor kay jalwoon say bani daikh
Zulfoon ki mahak Naafa-e-mushk-e-khatni daikh
Nisbat agar alfaaz ko doon Qaus-e-qazah say
Sairaab hoon shayad may mana ki qadah say

Aye Taha-o-Muzammil-o-yaseen-o-Mudassir
Aye Sayyad-o-Sardaar-e-umam Tayyib-o-Tahir
Kia keh kay pukaaray meray Aqa ko ye shayer
Tasweer-e-khudawand kay shahkaar Musawwar
Kham garden-e-Tafseer hay sharmandah Saraahat
Ya Rabb! Meray Alfaaz ko day nahaj-e-balagat

Aye Sall-e-Ala Noor shah-e-Jinn-o-bashar Noor
Lab Noor dahan Noor sukhun Noor Nazar Noor
Sar Noor Qadam Noor shikam Noor kamar Noor
Jis ghar man tera zik’r karain log, wo ghar Noor
Aan Zeenat-e-Konain-o-zaiba-e-jahan As’t
Aan bayes-e-Hairaani Aayenah giran As’t

Ham ko bhi khabar hay ke gunahoon ki saza hay
Lakin wo khata posh hamara bhi Khuda hay
Zahid ko agar Naaz-e-Ibaadat hay baja hay
Pallah man hamaray bhi Muhammad ki Sana’e hay
Mahshar man jo niklay ga yehi Naam dahan say
Jhuk jaye ga pallah mera neki kay wazan say

Wo maah-e-arab, maah-e-mubeen, maah-e-liqa hay?
Tasweer hay, Tanweer hay, Tabeer hay , kia hay ?
Ik Noor ka paikar hay ke pardah man Khuda hay
Aafaq man ayesa na to hoga na huwa hay
Aashiq ki sada ye hay meray dil man nahan hay
Jibreel sar-e-ar’sh pukaaray wo yahan hay

Ye junbash-e-lab, Taab-e-sukhun, aur ye guftaar
Ifkaar ki yorash hay to alfaaz ki yalgar
Ho jaye agar waq’f-e-sana-e-shah-e-abraar
Hota hay wo Hassan ki manand ghar baar
Rahta hay isi duhan man wo shab ho ke sahar ho
Jis par meray Sarkaar ki ik baar nazar ho

Comments are off for this post

Nigah ho ke sama’et zaban ho ke qalam
Chalay hain qaflah madah man qadam baqadam
Kabhi zaban ka da’ewa ke ham hain bar tar ham
Kabhi qalam ki ye gairat ke ham say sab hain kam
Ye ma’erkah bhi to wajah-e-husool-e-sabqat hay
Husool sabqat madhat bhi husun-e-madhat hay

Qalam nay khainch diay naqash wok e sab hairaan
Zaban nay dil say nikalay khitaab kay arman
Suna raha hoon usi ma’erkah ki baat yahan
Ke jis kay nuqtay sitaray to lafz kaah kashan
Sama’etoon ko jo lay jaye hauz-e-kausar tak
Suroor jis ka rahay dil man roz-e-mahshar tak

Chala hay aaj qalam saya-e-karam lay kar
Gadaaz dil ka, tarhap aur chashm-e-nam lay kar
Shauoor-o-fik’r ka hathoon man jaam-e-jam lay kar
Khayaal-e-Sarwar-e-konain Muhtram lay kar
Rawan buraaq ki maanand lay kar
Firshtay Aaye hain aflaak say gawahi man

Zuban khuli kay phiraira khula hay Rahmat ka
Har ayek simat huwa ghul Azaan-e-ulfat ka
Nimaz ishq ka aur sajdah mahabbat ka
Sarwar-e-jaan hay jo sab ka isi ki madhat ka
Sama’etoon ka ye aalam ke gaush’ bar awaz
Meray Rasool ki madhat ka yoon huwa Agaz

Jhuka ke rabb do aalam kay paish apni jabeen
Kaha qalam nay ke khallaq-e-Asman-o-Zameen
Raqam ho teray Nabi ka bayan itna haseen
Ke harf harf sitarah to nuqtah nuqtah nageen
Zameen pe shor to halchal ho aasmanoon man
Firshtay choom kay bandhain usay amamoon man

Barhay adab say zuban ne ye ar’z ki ya rabb
Ada ho mujh say bhi apnay bayan ka mansab
Meri sada ho rawan jesay Noor ka murkab
Falak pe aaye nazar jesay raat man kaukab
Ke hay Nabi Samee’a-o-Baseer ki tauseef
Khabar jo Gaib ki day us khabeer ki tauseef

Kaha qalam nay ke tahreer meri lasaani
Khiyaal lafzoon man ayesa ke yoosaf-e-Sani
Tamaam harf guman ye ke, la’el ramaani
Har ik sitar meri kahkshan ki peeshani
Meri siyahi gunahoon ko dhonay waali hay
Sayee zaroor hoon lakin sifat bilali hay

Zuban ye boli ke man aaj hoon turb-e-manoos
Hay shauq raqs man meray bayan ka taous
Haseen khiyaloon say roshan hain ja baja fanoos
Ye zik’r-e-Tayyib-o-Tahir ke hay meri Namoos
Sunay jo khar bayaban to rang-o-boo man dhalay
Teray Habeeb ka wo zik’r ho ke too bhi sunay

Kaha qalam nay ke man har bayan ka malboos
Meri khamoshi hay ulfat ka naala-e-naqoos
Sana-e-sarwar-e-konain ka hoon man fanoos
Ye khad-o-khaal hain meray hi loh par manqoosh
Safaid par man siyahi ka daag hota hoon
Par aashiqoon kay diloon ka charaag hota hoon

Kaha zuban nay ke ra’naaye man nay ki hay kasheed
Meri nawa say hi boo-e-khitaab ki hay shumeed
Kahin sarwar-e-balagat, kahin faseeh nasheed
Khulain na par meray, parwaz kia karay gi shuneed
Har ik zaman man fazayen yateem, meray begair
Kalaam kis ko sunayen kaleem meray begair

Suna jo roz-e-bayan-e-madeeh-e-shah-e-umam
Jhuka adab say hamaishah ki tarah faraq qalam
Raqam taraaz huwa, aye khuda! Teri hay qasam
Azal say was’f-e-nigaar-e-Huzoor hoon paiham
Gunaah gar nahi doob kar siyahi man
Har aik naat hay meri isi gawahi man

Man khainch lawon ga fan ka har ik satar man kamala
Hisaar-e-khat man haseenan-e-rang-o-boo ka Jamaal
Likhoon ga jab man sulaiman Naat ka ahwaal
Hamain bhi izin do, balqees-e-fan karay gi sawal
Nabi ka faiz hay, faiz-o-kamaal par hay girift
Rah-e-farraaz na doon ga, khiyaal par hay girift

Azal say ta be abad loh par noshta man
Kahin pe haal hoon aur hoon kahin guzushta man
Hoon dast-e-kaatib-e-taqdeer man nishastah man
Sanaa’e kay was’f say ham rutba firshtah man
Man apnay rang man rang-e-gilaaf-e-kaabah hoon
Rukh-e-bilal-o-galeem-e-rasool-e-batha hoon

Ye ma’rkah jo suna, gaib say sada Aaye
Har ik chaman man unhain ki hay jalwah farmaye
Faqat qalam hi nahi un ka ayek shaidaye
Faqat zuban ko hi hasil nahi hay yaktaye
Shajar hajar hoon mah-o-mihir hoon zuban-o-huroof
Wujood jin ko mila sab sanaa man hain masroof

Zuban ko nutuq diya kul ki aabroo kay liye
Meray Habeeb ko aana tha guftugoo kay liye
Qalam bana usi tahreer-e-mushak-e-boo kay liye
Har ik zamana man islaam ki numoo kay liye
Rasa ho Adam khaki ke dil man tum donoon
Meray Habeeb ki jo yaad man ho gum donoon

Comments are off for this post

Aankh man jab ashk Aaya ho gaye Naat-e-Rasool
Dard jab dil man samaya ho gaye Naat-e-rsool

Jab kisi bay bas ko daikha Zulum ka hotay shikaar
Is Zalim say churhaya ho gaye Naat-e-Rasool

Jihil ki tareekiyoon man iatmad ilam ka
Ik dia jis nay jalaya ho gaye Naat-e-Rasool

Jab kisi Masooom ko paya yateemi ka shikaar
Apnay seenay say lagaya’ ho gaye Naat-e-Rasool

Imtiaz-e-bandah-o-Aaqa mitanay kay liye
Jab koi maidaan man aaya ho gaye Naat-e-Rasool

Kha kay sang dushmanan-e-deen agar ye keh dia
Kar bhala is ka khudaya, ho gaye Naat-e-Rasool

Yaad kar kay arsa-e-sha’ab-e-Abi Talib kabhi
Jis nay do Aansoo bahaya ho gaye Naat-e-Rasool

Mohsin-e-insaniat ki jaan kar, sunnat agar
Jis ne rotoon ko hansaya, ho gaye Naat-e-Rasool

Kia bataon kis qadar hain mehrban mujh par huzoor
Jab qalam man ne uthaya ho gaye Naat-e-Rasool

Seerat-e- خیر البشر ko daikhta ja aye adeeb!
Jo warq nay to uthaya ho gaye Naat-e-Rasool

Comments are off for this post

Jalal-e-Aayat-e-Quran ko jo sahaar sakay
Nabi kay dil ky siwa doosra maqam nahi

Wo lazzat-e-Gam-e-ish’q-e-Rasool kia janay
Durood jis kay laboon par nahi salaam nahi

Wo dushmanoon ka hadaf wo Qureish ka mazloom
Magar kisi say liya koi intiqaam? Nahi

Khiyal us kay taqqub man thak kay baith gaya
Safar buraaq pe us ka magar tamam nahi

Tamam umar na paye, milay to lamhoon man
Mataa’e-e-ish’q-e-Muhammad mazaaq-e-aam nahi

Comments are off for this post

Diyar-e-madah an alfaz ka jab karwan nikla
Alam lay kar qalam nikla’ ada ban kar bayan nikla

Basad andaaz-e-ra’naye, basad husun-e-shakeebaye
Barang-e-gulustan nikla, bashakal-e-kahkshan nikla

Udhar chirhka jorih man chandni ko maah-e-nudrat nay
Idhar khursheed-e-Ma’ana dar qubaye sad bayan nikla

Wafad Qaus-e-qazah laaye ke shamil rangtain kar lo
Tayooran-e-chaman dorhay ke daikho gulustan nikla

Ameer-e-karwaan ko muntakhab karnay ki baat aaye
Faqat ik ish’q ayesa tha jo sab man kamran nikla

Pay pardaz, baraq-e-takhyyul, samnay aaya
Tajassus nay zara sey ayerh di wo lamakan nikla

Buhut hi saaz-o-samaan kheema-e-fikir sukhun man tha
Magar un sab man aansoon hi mataa’e-e-karwaan nikla

Murassa’e ho gaye jab naat Husun-e-lafaz-o-ma’na sy
Adaye naat ka ik masala bhi imtihan nikla

Sunaya bulbul-o-qamari nay so andaaz say lakin
Adeeb-e-khush nawahi tha jo sab man khush bayan nikla

Comments are off for this post

Khiraaj-e-ashak say qaim hay qaisarey meri
Sarwar-e-ish’q-e-Risalat, sikandari meri

Ye mera ah’d-e-gulami, gualami-e-shah-e-deen
Us ah’d man hay khiyaloon pe afsari meri

Gazal ka phair kay rukh lay chala sana ki taraf
Haraf haraf ko pasand aaye rahbari meri

Ameer-e-shah’r-e-sukhun hoon faqeer-e-koi Rasool
Unehain say fiqar’ unehain say taungari meri

Mata’e-e-Naat isi dar say man nay paye hay
Na kiyoon ho Naaz kay qabil sukhun wari meri

Wo wardat jo guzuri hay meray dil pe adeeb
Samajh rahay hain usay log shayeri meri

Comments are off for this post