نُور ظہور حق ہے کیا؟ نور جمال مصطفی

نُور ظہور حق ہے کیا؟ نور جمال مصطفی
طرز کلام رب ہے کیا؟ حسن مقال مصطفی
دل کا ہے کام،کام کیا ؟ محو خیال مصطفی
دیدہ شوق،شوق کیا؟ دید جمال مصطفی
عشق کا مدعا سنو،حُسن کا منتھا سُنو
ایک خیال مصطفی ،ایک جمال مصطفی
غایت کن،حضور کے حسن کا اہتمام تھی
حشر جو ہوگا ،ہوگا کیا ،دید جمال مصطفی
قبر میں جو بھی آئیں گے دیکھ کے لوٹ جائیں گے
دست گناہ گار میں،دامن آلِ مصطفی
مجھ سے گناہ گار کا روئے سخن تو دیکھنا
مدحت مصطفی ہے اور مدحت آلِ مصطفی
ان کی ثنا کے روزو شب ،تیرا نصیب ہیں ادؔیب
صبح فراق مصطفی ،شام خیال ِ مصطفی