اختر برج رفعت پہ لاکھوں سلام
آفتابِ رسالت پہ لاکھوں سلام
مجتبٰے شانِ قدرت پہ لاکھوں سلام
مصطفٰے جانِ رحمت پہ لاکھوں سلام
شمعِ بزم ہدایت پہ لاکھوں سلام
جس کی عظمت پہ صدقے وقارِحرم
جس کی زلفوں پہ قرباں بہارِحرم
نوشۂ بزمِ پروردگارِ حرم
شہریارِ ارم تاج دارِ حرم
نو بہارِ شفاعت پہ لاکھوں سلام
جس کے قدموں پہ سجدہ کریں جانور
مُنہ سے بولیں شجر دیں گواہی حجر
وہ ہیں محبوبِ ربّ مالکِ بحرو بر
صاحبِ رجعتِ شمس وشقُّ القمر
نائبِ دستِ قدرت پہ لاکھوں سلام
لا مکاں کی جبیں بہرِ سجدہ جُھکی
رِفعتِ منزلِ عرش اعلیٰ جُھکی
عظمتِ قبلۂ دینِ و دنیا جُھکی
جن کے سجدے کو محرابِ کعبہ جُھکی
اُن بھوؤ ں کی لطافت پہ لاکھوں سلام
جس کے جلوے زمانے میں چھانے لگے
جس کی ضَوء سے اندھیرے ٹھکانے لگے
جس سے ظلمت کرے نور پانے لگے
جس سے تاریک دل جگمگانے لگے
اُس چمک والی رنگت پہ لاکھوں سلام
پڑ گئی جس پہ محشر میں بخشا گیا
دیکھا جس سَمت ابرِ کرم چھا گیا
رُخ جدھر ہوگیا، زندگی پاگیا
جس طرف اُٹھ گئی دَم میں دَم آگیا
اُس نگاہِ عنایت پہ لاکھوں سلام
ڈوبا سورج کسی نے بھی پھیرا نہیں
کوئی مثلِ یداللہ دیکھا نہیں
جس کی طاقت کا کوئی ٹھکانہ نہیں
جس کو بارِ دو عالم کی پرواہ نہیں
ایسے بازو کی قوت پہ لاکھوں سلام
جب ہوا ضَو فِگن دین و دنیا کا چاند
آیا خَلوَت سے جَلوَت میں اَسْرٰی کا چاند
نِکلا جس وقتِ مَسعودِ، بطحا کا چاند
جس سہانی گھڑی چمکا طیبہ کا چاند
اس دل افروزِ ساعت پہ لاکھوں سلام
حق کے محرم اِمام التّقٰے وَانّقٰے
ذاتِ اکرم امام التّقٰے وَانّقٰے
قطبِ عالم التّقٰے وَانّقٰے
غوثِ اعظم التّقٰے وَانّقٰے
جلوۂ شانِ قدرت پہ لاکھوں سلام
مرشدی شاہ احمد رضا خاں رضا
فیضیابِ کمالات حسّاں رضا
ساتھ اختر بھی ہوں زمزمہ خواں رضا
جبکہ خدمت کے قدسی کہیں ہاں رضا
مصطفٰے جانِ رحمت پہ لاکھوں سلام
اے صبا لے جا مدینے کو پیام عرض کردے ان سے با صد احترام
اے مکینِ گنبدِ خضرا سلام اے شکیبِ ہر دل شیدا سلام
اب مدینے میں مجھے بُلوائیے اپنے بیکس پر کرم فرمائیے
بُلبلِ بے پر پہ ہو جائے کرم اشیانش دِہ بگلزار حرم
ہند کا جنگل مجھے بھاتا نہیں بس گئی آنکھوں میں طیبہ کی زمیں
زندگی کے ہیں مدینے میں مزے عیش جو چاہے مدینے کو چلے
ہے مدینے چشمۂ آبِ حیات زندگی کو ہے مدینے میں ثبات
خلد کی خاطر مدینہ چھوڑدوں اِیں خیال است ومحال است وجنوں
خُلد کے طالب سے کہدو بے گماں طالب طیبہ کی طالب ہے جناں
مجھ سے پہلے میرا دل حاضر ہوا ارضِ طیبہ کس قدر ہے دِلرُبا
کتنی پیاری مدینے کی چمک روشنی ہی روشنی ہے تافلک
کتنی بھینی ہے مدینے کی مہک بس گئی بوئے مدینہ عرش تک
یا رسول اللہ از رحمت نگر در بقیع پاک خواہم مُستقر
بس انوکھی ہے مدینے کی بہار رشکِ صد گل ہیں اسی گلشن کے خار
کتنی روشن ہے یہاں ہر ایک شب ہر طرف ہے تابشِ ماہِ عرب
کیا مدینے کو ضرورت چاند کی ماہِ طیبہ کی ہے ہر سو چاندنی
نور والے صاحب معراج ہیں مہر و ماہ ان کے سبھی محتاج ہیں
اے خوشابختِ رسائے اخترت باز آور دِی گدارا بردرت
چراغاں چراغاں پیام ِمحمد ﷺ
بہت مستند ہے کلامِ محمد ﷺ
امیر و گدا میں نہیں فرق کوئی
زمانے میں یکساں نظام ِمحمد ﷺ
عدالت، شجاعت، سخاوت ،وفا میں
شہنشاہ ِ دوراں غلامِ محمد ﷺ
ازل سے لٹاتا ہوا پھول غنچے
ابد تک ہے گردش میں جام محمد ﷺ
شفیعِ امم بھی ، وہ ختم الرسل بھی
بہت ارفع اعلیٰ مقام محمدﷺ
مدینہ بھی ہے مستقر اُن کا اخؔتر
مکاں لامکاں بھی قیامِ محمدﷺ
