تری مدح خواں ہر زباں غوثِ اعظم
ترا نام مومن کی جاں غوثِ اعظم
پناہِ غریباں تری ذاتِ والا
ترا گھر ہے دارُ الاماں غوثِ اعظم
ترے جدّ ِ امجد ہیں نورِ الٰہی
ہے نُوری ترا خانداں غوثِ اعظم
ترے وعظ میں آکے شاہِ عرب نے
بڑھادی تری عز وشاں غوثِ اعظم
ملے گی ہمیں تیرے دامن کے نیچے
دو عالم میں امن و اماں غوثِ اعظم
ذرا صدق دل سے پکارو تو ان کو
ابھی جلوہ گر ہوں یہاں غوثِ اعظم
جمیل اب ہوں ساکت مقام ادب ہے
کہاں تیرا منہ اور کہاں غوثِ اعظم