ik mai.n hii nahii. un par qurbaan zamaana hai

jo rabb-e-do-a.alam kaa mahbuub-e-yagaana hai

kal jis ne hame.n pul se KHud paar lagaanaa hai

zohra kaa vo baabaa hai sibtain kaa naanaa hai

us haashmii duulhaa par kaunain ko mai.n vaaruu.n

jo husn-o-shamaa.il me.n yaktaa-e-zamaana hai

izzat se na mar jaa.e.n kyuu.n naam-e-mohamaad par

ham ne kisii din yuu.n bhii duniyaa se to jaanaa hai

aa.o dar-e-zohra par phailaa.e hu.e daaman

hai nasl kariimo.n kii laj-paal gharaanaa hai

huu.n shaah-e-madiina kii mai.n pusht-panaahii me.n

kyaa is kii mujhe parvaah dushman jo zamaana hai

ye kah ke dar-e-haq se lii maut me.n kuchh mohlat

miilaad kii aamad hai mahfil ko sajaanaa hai

qurbaan us aaqaa par kal hashr ke din jis ne

is ummat-e-aasii ko kamlii me.n chhupaanaa hai

sau baar agar tauba TuuTii bhii to hairat kyaa

baKHshish kii rivaayat me.n tauba to bahaana hai

har vaqt vo hai.n merii duniyaa-e-tasavvur me.n

ai shauq kahii.n ab to aanaa hai na jaanaa hai