Tuu amiir-e-haram mai.n faqiir-e-‘ajam
tere gun aur ye lab mai.n talab hii talab
tuu ‘ataa hii ‘ataa mai.n KHataa hii KHataa
tuu kujaa man kujaa
tuu hai ehraam-e-anvaar baa.ndhe hu.e
mai.n daruudo.n kii dastaar baa.ndhe hu.e
kaa’ba-e-‘ishq tuu mai.n tere chaar-suu
tuu asar mai.n du’aa tuu kujaa man kujaa
meraa har saa.ns tuu KHuu.n nicho.De meraa
terii rahmat magar dil na to.De meraa
kaasa-e-zaat huu.n terii KHairaat huu.n
tuu saKHii mai.n gadaa tuu kujaa man kujaa
tuu haqiiqat hai mai.n sirf ehsaas huu.n
tuu samandar hai mai.n bhaTkii hu.ii pyaas huu.n
meraa ghar KHaak par aur tirii rahguzar
sidrat-ul-muntahaa tuu kujaa man kujaa
Dagmagaa.uu.n jo haalaat ke saamne
aa.e teraa tasavvur mujhe thaamne
merii KHush-qismatii mai.n teraa ummatii
tuu jazaa mai.n razaa tuu kujaa man kujaa
duuriyaa.n saamne se jo ha.Tne lagii.n
jaaliyo.n se nigaahe.n lipaTne lagii.n
aa.nso.o.n kii zabaa.n merii hai tarjumaa.n
dil se nikle sadaa tuu kujaa man kujaa