Ye na puuchho milaa hame.n dar-e-kHair-ul-varaa se kyaa

ye na puuchho milaa hame.n dar-e-kHair-ul-varaa se kyaa
nazar un kii pa.Dii to ham hu.e pal-bhar me.n kyaa se kyaa

mire dil kii vo dha.Dkane.n dam-e-fariyaad sunte hai.n
mutavajjah jo hai.n vo hai.n mujhe baad-e-sabaa se kyaa

nazar un kii jo ho ga.ii asar aayaa du’aa me.n bhii
mire dil kii ta.Dap hii kyaa mire dil kii sadaa se kyaa

jise is kaa yaqiin hai ki vahii bakHshvaae.nge
ko.ii KHatra ko.ii jhijhak use roz-e-jazaa se kyaa

rah-e-taiba me.n be-KHudii ke manaazir hai.n diidanii
kabhii naqshe hai.n kuchh se kuchh kabhii jalve hai.n kyaa se kyaa

jise KHairaat be-talab mile baab-e-rasuul se
use daarain me.n ‘nasiir’ Garaz maa-sivaa se kyaa